Dhukkuba Meninjaayitis

Meninjaayitisiin dhukkuba yommuu dhangala’aa fi meembraanonni sammuu fi lafee dugdaatti marsanii jiran infekshiniidhaan qabaman uumamuudha. Yoo yeroon hin yaalamu ta’e dhukkuboota hamaa kan akka dhibee gaggabsaa (seizure), laamsha’uu qaamaa, jaamummaa, dhageetti dhabuu fi du’a dabalatee dhukkuba fiduu danda’uudha. Akkuma infekshinoota biroo biyyii keenya saaxilammummaan dhukkuba kanaaf qabdu guddaadha.

Dhukkubni kun baakteeriyaa, vaayirasii, fangasii fi TB irraa kan dhufuu danda’u yoo ta’u, sababa isaa adda baasuun qoricha barbaachisaa ta’e kennuudhaan dhibee kana saffisaan fayyisuuf gargaara.

Akka addunyaattis ta’e akka biyya keenyaa namoonni dhukkuba meninjaayitisiin qabaman irra caalaan isaanii infekshinii vaayirasiitiin kan dhufanidha.

• Talaallii fudhachuu dhabuu.
• Umriin waggaa 5 gadii ykn waggaa 50 ol ta’u. Irra caalaan dhukkuba meninjaayitisii vaayirasii daa’imman umuriin isaanii waggaa 5 gadi ta’e irratti mul’ata. Dhibeen meninjaayitisii baakteeriyaa immoo namoota umuriin isaanii waggaa 20 gadi ta’e irratti baay’inaan mul’ata.
• Baay’atanii kutaa tokko keessa jiraachu.
• Ulfa ta’u.
• Wantoota dandeettii dhukkuba ofirraa ittisuu hir'isan kan akka HIV, dhibee sukkaaraa,alkoolii baay’isanii dhuguu, kkf.

Mallattoon dhukkuba meninjaayitisii gara jalqabaa irratti mul’atu dhukkuba qufaa wajjiin wal fakkaachuu danda’a. Mallattoowwan nama kamiyyuu irratti mul’achuu danda’an kan armaan gadiitti eeraman dha:

• Ho'a qaamaa olaanaa ta’e
• Jabaachuu mormaa
• Mataa dhukkubbii cimaa
• Garaa kaasaa
• Burjaajii ykn rakkina xiyyeeffannaa qabaachu
• Rakkina hirribaa
• Ifaaf miira jabaa qabaachuu
• Fedhii nyaataa fi dheebuu dhabuu
• Gogaan dhiita’uu Daa’imman reefuu dhalataniifi daa’imman umuriin isaanii waggaa 1 gadi ta’an mallattoolee kan armaan gadii agarsiisuu danda’u:
• Ho'a qaamaa olaanaa
• Yeroo hunda boo'uu
• Hirriba baay’isuu
• Hirriba keessaa dammaquu dadhabuu
• Nyaata sirriitti nyaachuu dhiisuu
• Bulgaatii
• Bakka lallaafaa mataa daa'imaa gubbaa jiru irratti dhitoon jiraachu
• Jabaachuu qaamaa fi mormaa

Daa’imman talaaluunis carraa dhukkuba kanaan qabamuu haalaan ni hi’isa. Baakteeriyaan ykn vaayirasoonni dhukkuba meninjaayitisii fiduun beekamoo ta’an qufaa, haxxiffannaa fi wal-dhungachuun daddarbuu danda’u. Kana malees meeshaalee nyaataa ykn dhugaatii fi buruushiin ilkaanii waliin qooddachuun babal’achuu danda’u. Kanaaf of-eeganno armaan gadii gochuun barbaachisaadha:

• Harka dhiqachuu
• Meeshaalee nyaataa ykn dhugaatii, buruushii ilkaani waliin qooddachuu dhiisuu
• Yeroo qufaa ykn haxxiffuu funyaanii fi afaanii ofii haguuggachuu

Ogeessi fayyaa seenaa yaalaa, qorannoo qaamaa fi qorannoo murtaa’e irratti hundaa’uun dhukkuba meninjaayitisii adda baasuu danda’a. Qorannoowwan dhukkuba meninjaayitisii adda baasuuf gargaaran kanneen armaan gadiiti:

• Qorannoo dhiigaa (blood culture)
• Saamuda dhangala’aa dugda duuba irraa fudhatame qorachuu
• CT ykn MRI sammuu

Wal’aansi dhukkuba kanaa gosa dhukkubichaa irratti hundaa’a.

• Dhukkubni meninjaayitisii baakteeriyaa qoricha farra baakteeriyaa/antibaayootikii karaa hidda dhiigaan laatamuun fi yeroo tokko tokko ammoo kortikoostirooyidiin yaalamuu qaba. Filannoon antibaayootikii gosa baakteeriyaa dhukkuba kana fidu irratti hundaa’a.
• Dhukkubni meninjaayitisii vaayirasii antibaayootikiidhaan fayyuu kan hin dandeenye yoo ta'u namoonni baay'een adeemsa keessatti ofuma isaaniitiin fooyya'u. Wal’aansi dhukkubsatootta akkasii kanneen armaan gadii of keessatti qabata:
• Boqonnaa siree
• Dhangala’oo baay’ee fudhachuu
• Qoricha dhukkubbii ho'a qaamaa hir'isuu fi dhukkubbii qaamaa salphisuuf gargaaru fudhachuu