Namni fayyaa qabeessi tokko, kalee lama kara bitaa fi mirgaa irraa kan qabu yoo ta’u, yeroo tokko tokko uumamaan namni kalee takka qofa qabatee dhalatu illee darbee darbee ni jira. Yeroo tokko tokko ammoo kaleen kara tokkoon dhukkuboota gargaraan yoo hubamee hojii ala ta’u, mana yaalaatti kaleen tokko ba’uudhaan namni kalee tokkoon jiraatu ni jira.
Qaamni keenya nyaata yoo fayyadamu, yeroo annisaa maddisiisu fi haalota garagaraa keessa yoo darbu, xuraawaa garagaraa qaama keessaati gadi lakkisa. Xuraawwaan qaama keenya keessatti gadi lakkifaman kun yeroodhaan qaama keessaa dhabamsiifamuu yoo baatan qaama keenya irratti miidhaa cimaa fiduudhaan lubbuu galaafatu.
Namni tokko kalee lama haa qabaatu malee kaleen fayyaan tokko qofti hojii
xuraawaa dhabamsiisuu kana hojjechuu ni danda’a. Kaleewwan lameen yoo
miidhaman garuu akkuma armaan olitti ibsame xuraawwaan kun qaama keessatti
kuufamuudhaan lubbuu namaa galaafata.
Dabalataanis kaleen keenya elementoonni akka haala madaalamaatin argaman, dhiigni diimaan qaama keenyaaf barbaachisu akka sirriitti oomishamu fi akkasumas lafeen akka sirritti ijaaramu taasisuu fi kanneen biroo hedduu dalaga.
Dhukkuboonni garagaraa hedduun kaleen miidhu kan danda’an yoo ta’u, yeroo hedduu dhukkuba kalee namatti fiduudhaandhukkuboonni beekaman: dhukkuba sukkaaraa, dhiibbaa dhiigaa fi dhukkuba kulkula giloomerulasii kalee (Glomerulnephritis) irraan kan dhufanii dha. Kanneen keessaa bay’inaan kan argaman dhiibbaa dhiigaa fi dhukkuba sukkaaraati. Kanaafuu dhiibbaa dhiigaa seeraan yaalamuu fi dhukkuba sukkaraa seeraan to’achuun dhukkuba dadhabuu kalee irraa akka nama baraaru hubachuun barbaachisaadha. Kana malees, qorichoonni garaa garaa, keessumaa kanneen ajaja ogeessa fayyaa malee fudhataman, kalee keenya irratti miidhaa guddaa geessisuu danda’u. Keessumaa kaleen erga miidhamee booda qorichoota fudhannu irratti of eeggannoo guddaa taasisuu barbaachisaa dha.
Malattoolee dadhabuun kalee kun argisiisu keessaa:
- Dadhabbii qaamaa humnaa olii
- Nyaata jibbisiisuu
- Hir’ina dhiigaa fi mallattoolee hir’ina dhiigaa argisiisuu
- Qaamni namaa dhiita’uu (keessumaa fuula irraatti ganama ganama dhiita’uu fi san booda ammoo qaama hunda dhiitessuu)
- Qaamni huqqachuu (ulfaatinni garmalee hir’achuu) fi kkf dha.
Dhukkubni kalee mallattoolee gargaraa kan argisiisu yeroo hedduu erga kaleen baay’ee miidhamee booda. Kun ammoo akka namni dhukkuba kana qabaachuuf dhiisuu ofirratti hin barree fi dafee akka seeraan hin yalamne taasisa. Kanaafuu namni carraan dhukkuba kaleen dadhabuu kanaan hubamuun isaa olka’aa ta’e, keessumaa nama dhiibbaa dhiigaa qabu, nama dhukkuba sukkaraa qabuu fi mallattoolee dhukkuba kalee (armaan gaditti ibasaman) ofirratti arge mana yaala adeemuun akka dhukkuba kalee kana qabu of qorachiisuun dirqama.
Dhukkubni kalee qorannoo dhiigaa salphaa fi altiraasaawondii kalee qofaan adda baafachuun ni danda’ama. Erga adda baafatanii booda, akkuma beekamu dhukkubni kalee sadarkaa hedduu waan qabuuf, sadarkaan isaa adda ba’ee dhukkubsataa sanatti ni himama, yaalliwan garaagaraas ni godhamaa deema.
Yeroo hedduu gargaarsi fi yaalli godhamu waantoota dhukkuba kalee sana namatti fidan adda baasuudhaan, haga danda’ame irraa of eeguu yokaan dadhabamsiisuudha. Fakkeenyaaf namni dhukkuba sukkaaraa osoo qabuu kaleen isaa dadhabaa dhufe tokko to’annoo sukkaaraa isaa cimsuun dirqama. Kan dhiibbaa dhiigaa illee akksuma. Kana malees qoricha kam iyyuu gorsa ogeessa fayyaan alatti namni dhukkuba kalee sadarkaa kam iyyuu qabu tasuma fudhachuu hin qabu. Kunis qorichoonni tokko tokko dhukkubbii mataa fi kkf niif mana qorichaa irraa akka salphaatti bitaman, kalee xiqqoo miidhame ittuu balleessuu waan danda’aniif jechuudha.
Yoo kaleen dadhabee hojii dhaabu yaalli godhamu gara kalee bakka buusuu (renal replacement therapy) xiyyeeffata.
Yaalota kalee bakka buusuu (renal replacement therapy) keessaa inni jalqabaa kalee nama fayyaa kan kaleen isaa/ishee lameenuu fayyaa ta’an keessaa tokko baasuudhaan nama kaleen isaa dadhabe kanaaf kennuudha. Yaalli kun nama kalee fudhatuu fi nama kalee kennu kana lameeniifuu oopereshinii gochuudhaan isa fayyaa keessaa fuudhanii isa dhukkubsaateef jijjiiruudhaan kanraawwatamuudha.
Yaalli kalee bakka buusuu inni lamaffaa immoo meeshaa namtolchee kan xuraawaa qaama keessaa kaleen gadi baasuu dadhabde sana, ofii isaa bakka kalee bu’uudhaan dhiiga qulqulleessuudha. Inni kun dialysis jedhama. Yeroo hedduu hawaasa keessatti “yaala kalee dhiquu/miicuu/ jedhuun haa waamamu malee meeshaan kun kalee bakka bu’uudhaan dhiiga xuraawaa gargaraa irraa miica malee kalee miica miti. Rakkoon guddaan maashinii kalee bakka bu’ee dhiiga qulqulleessu kanaa gatii (kaffaltii) isaati. Kaleen nama tokkoo yoo guutummaa guutuutti dadhabe, yoo xiqqaate torbanitti dhiigni namaa kanaa maashina kanaan al sadii qulqullaa’uu qaba. Kun ammoo haga namni sun lubbuun jirutti, yoo kaleen nama biraa irraa jijjirameef irraa kana hafe itti fufa. Waanti (maashinni) harki namaa oomishe haga ta’e lubbuu namaa haa dheeressu malee, haga kalee harki rabbi uume sanii dhiiga namaaf qulqulleessuu hin danda’u. Kanaaf yoo danda’ame maashina kanaan dhiigaa dhiqsiisuu caalaatti kalee nama biraa irraa jijjirrachuun yaala fooyya’aadha.
ይህ መረጃ ለግንዛቤ ብቻ ነው፤ የሐኪም ምክርን አይተካም።