እርግዝና እና የእርግዝና ክትትል

የእርግዝና ምልክቶችን ማወቅ በጊዜ ተገቢውን ክትትል በመጀመር ከእርግዝና ጋር የሚመጡ በሽታዎችን በጊዜ ለመለየት እና ለመታከም ይረዳል።

ቀጣይ ያሉትን ምልክቶች ልብ ካሉ ቶሎ አቅራቢያ ወዳሉ የጤና ተቋማት በመሄድ የእርግዝና ምርመራ ማድረግ እና ክትትል መጀመር ያስፈልጋል።

• የወር አበባ መቅረት
• ሽንት ቶሎ ቶሎ መምጣት
• በተፈጥሮ ከማህጸን የሚወጣው ፈሳሽ ነጣ ማለት እና በብዛት መጨመር
• የጡት መጠን መተለቅ እና የጡት ጫፍ ላይ መጠነኛ የሆነ ህመም መሰማት
• የሰውነት ክብደት መጨመር ይገኙበታል። ብዙ እርጉዝ ሴቶች ከ 18-20 ሳምንት ጊዜ የጽንሱ እንቅስቃሴን መለየት ይችላሉ ከዚህ በኋላ የጽንሱን ጤንነት ከሚከታተሉበት መንገዶች አንዱ ስለሆነ ይህን በቅርብ መከታተል ተገቢ ነው።

• የአይረን ክኒን መዋጥ መጀምር፡ በእርግዝና ግዜ የእናት ደም መጠን በይዘት እስከ 45% ያህል ይጨምራል ይህም የሚሆነው ለጽንሱ ደም መላክ እና ለእድገቱ አስተዋጾ ማረግ ስላለባት እና ከወሊድ ጋር ተያይዞ የሚኖር የደም መፍሰስን ስለሚጠበቅ ሰውነት ለዛ የደም መፍሰስ ምካሻ እንዲሆን ነው። ለዚህ የደም ይዘት መጨመር ደግሞ አይረን አስፈላጊ የሆነ ንጥረነገር ነው። በምግብ የምናገኘው አይረን በቂ ስለማይሆን ተጨማሪ እንክብሎች መውሰድ ከእናቲቱ ይጠበቃል።
• ፎሊክ አሲድ እንክብል፡ ፎሊክ አሲድ የጽንሱ አንጎል እና ህብለሰረሰር በትክክል እንዲሰራ የሚረዳ ንጥረነገር ሲሆን ከእርግዝና አንድ ወር ቀደም ተብሎ መወሰድ ቢጀመር ይመረጣል፣
  ቢሆንም ያልታሰበ እርግዝና ሲፈጠር ደግሞ በተቻለ ፍጥነት በእናቲቱ መወሰድ መጀመር አለበት። የፎሊክ አሲድ እጥረት የአንጎል ውሃ መቋጠር እና የጀርባ ያለመዘጋትን የመሳሰሉ አስከፊ ውጤቶችን ሊያደርስ ይችላል።
• የኤች አይ ቪ ፣ የጉበት ቫይረስ፣ የቂጥኝ ምርመራዎች፡ እነዚህ ምርመራዎች በጊዜ መደረጋቸው ቢገኙ እናቲቱ ቶሎ መድሃኒት ጀምራ ወደ ጽንሱ የመተላለፍ እድላቸውን ለመቀነስ ይረዳል።
• የሽንት ምርመራ ይህ የሚደረገው

1. ምልክት የሌለው የሽንት ቧንቧ ኢንፌክሽን ካለ ቶሎ ለማከም ነው። ምልክት ሳያሳይ ባክቴሪያ የእናቲቱ ሽንት ውስጥ ሊታይ ይችላል ይህ ደሞ ምጥን ያለጊዜው ማምጣት የሽርት ውሃ ያለጊዘው መፍሰስ እና ጽንሱ በማህጸን እያለ የሚፈጠር የሳንባ ምች የመሰሉ አስከፊ ውጤቶች ሊያመጣ ስለሚችል በፍጥነት መታከም አለበት።
2. ከ20ኛው የርግዝና ሳምንት በኋላ የሚከሰተውን ከእርግዝና ጋር ተያይዞ የሚመጣ የደም ግፊት ህመምን ከምንለይበት መንገዶች አንዱ በሽንት በኩል የሚወገደው የፕሮቲን መጠን ስለሆነ እሱን ለማጣራት ይረዳል።

በእርግዝና ጊዜ ሊተገበሩ የሚገባ የአኗኗር ለውጦች

• ጥሬ ስጋ ያለመብላት

• የቡና ፍጆታን ከ200ሚግ (ሁለትየቡና ሲኒ) ያለማስበለጥ።

• ሲጋራ ያለማጨስ

• ያለሃኪም ውሳኔ እና ምክር ምንም አይነት መድሃኒቶችን መውሰድ አያስፈልግም

• የአንጀት ትላትል (ወስፋት) ማስወገጃ መድሃኒት መውሰድ በእርግዝና ጊዜ የደም ማነስ ከሚያመጡ መንሴዎች መካከል ዋነኛው ወስፋት ነው በመሆኑም እንደሃገራችን ያሉ አዳጊ ሃገራት ላይ ይህን እድል ለማጥበብ የወስፋት መድሃኒት በእርግዝና ጊዜ ይሰጣል።

በእርግዝና ጊዜ መከታተል ያለብን አስደንጋጭ ምልክቶች

• ክማህጸን የሚወጣ ደም
• ክማህጸን የሚወጣ መጥፎ ሽታ ያለው ፈሳሽ
• ከፍተኛ ራስ ምታት
• ከእንብርት በላይ የሚሰማ የማቃጠል ስሜት
• የጽንሱ እንቅስቃሴ መቀነስ
• የሽርት ውሃ ያለግዜው መፍሰስ
• የሆድ እና የጀርባ ቁርጠጥት(የምጥ ስሜቶች) ያለግዜው መከሰት
• ሽንት ሲሸኑ ማቃጠል እና ማጣደፍ እነዚህን ምልክቶች ከተመለከቱ በማንኛውም ጊዜ በአፋልጣኝ ወደ ድንገተኛ ክፍል መምጣት ይኖርቦታል።